ଘୁମୁସର ରାଜବଂଶରେ ଜନ୍ମଲାଭ କରିଥିବା ଉପେନ୍ଦ୍ରଭଞ୍ଜ ୧୭୦୩ ଖ୍ରୀ.ଅ.ରେ ନିଜର ପିତା ନୀଳକଣ୍ଠ ଭଞ୍ଜଙ୍କ ସହ ନୟାଗଡ଼ ରାଜାଙ୍କ ଆଶ୍ରୟ ଗ୍ରହଣ କରି ମାଳିସାହି ଗ୍ରାମରେ ଖମାରବାଡ଼ି ପାଇ ଆଜୀବନ ବାସ କରିଥିଲେ । ନୟାଗଡ଼ର ସାହିତ୍ୟିକ ବାତାବରଣ ଭିତରେ ସେ ସାରସ୍ୱତ ସାଧନାରେ ନିମଗ୍ନ ହୋଇ ଜଣେ ମହାକବିରେ ପରିଣତ ହୋଇପାରିଥିଲେ । ନୟାଗଡ଼ ରାଜା ତାଙ୍କୁ ନୟାଗଡ଼ ଦରବାରର ପାରମ୍ପରିକ ବୀରବର ଉପାଧି ପ୍ରଦାନ କରିଥିଲେ । ଏଠି ରହି ଉପେନ୍ଦ୍ରଭଞ୍ଜ ରଚନା କରିଥିଲେ- ଲାବଣ୍ୟବତୀ, କୋଟିବ୍ରହ୍ମାଣ୍ଡ ସୁନ୍ଦରୀ, ବୈଦେହୀଶ ବିଳାସ ଆଦି ପ୍ରସିଦ୍ଧ ଗ୍ରନ୍ଥ । ସେଥିପାଇଁ କୁହାଯାଏ – ଘୁମୁସର ଉପେନ୍ଦ୍ର ଭଞ୍ଜଙ୍କୁ ଜନ୍ମ ଦେଇଛି; ମାତ୍ର ନୟାଗଡ଼ ହିଁ କବି ସମ୍ରାଟଙ୍କୁ ସୃଷ୍ଟି କରିଛି ।
କବି ସମ୍ରାଟ ଉପେନ୍ଦ୍ର ଭଞ୍ଜ
