ଦଶପଲ୍ଲା,(ନୟାଗଡ଼ ଦର୍ପଣ): ଦିନକୁ ଦିନ ବିଜୁ ଜନତା ଦଳ ସାରା ରାଜ୍ୟରେ ସକ୍ରିୟ ହେବାକୁ ଲାଗିଛି। ଓଡିଶାର ବିଭିନ୍ନ ଜିଲ୍ଲାରେ ପ୍ରମୁଖ ବିରୋଧୀ ଦଳର ନେତୃତ୍ୱ ନେଉଥିବା ନେତାମାନେ ଏବେ ବିଜେଡିରେ ଯୋଗ ଦେଉଛନ୍ତି। ମାନ୍ୟବର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକଙ୍କ ନିର୍ମଳ ଆଦର୍ଶ, ସ୍ୱଚ୍ଛ ଶାସନ ଓ ଲୋକାଭିମୁଖୀ କାର୍ଯ୍ୟରେ ଅନୁପ୍ରାଣୀତ ହୋଇ ପ୍ରତ୍ୟେକ ଦିନ ହଜାର ହଜାର ବିରୋଧୀ ଶିବିର ଛାଡି ବିଜେଡିରେ ସାମିଲ ହେଉଛନ୍ତି। ଏ ପରିପ୍ରେକ୍ଷୀରେ ଭୁବନେଶ୍ୱର ଆଇନ ମହାବିଦ୍ୟାଳୟର ପୂର୍ବତନ ସଭାପତି ଚିନ୍ମୟ ପ୍ରଧାନଙ୍କ ସହ ଭୁବନେଶ୍ୱର ଏବଂ ଦଶପଲ୍ଲାର ବହୁ ଯୁବ ସଂଗଠକ ଦଶପଲ୍ଲା ବିଧାୟକ ତଥା ନୟାଗଡ଼ ଜିଲ୍ଲା ବିଜେଡ଼ି ସଭାପତି ଶ୍ରୀ ରମେଶ ଚନ୍ଦ୍ର ବେହେରାଙ୍କ ନେତୃତ୍ୱରେ ବିଜୁ ଜନତା ଦଳର ରାଜ୍ୟ ସାଙ୍ଗଠନିକ ସଂପାଦକ ତଥା ବିଧାୟକ ଶ୍ରୀଯୁକ୍ତ ପ୍ରଣବ ପ୍ରକାଶ ଦାସଙ୍କ ଉପସ୍ଥିତିରେ ବିଜୁ ଜନତା ଦଳରେ ଯୋଗଦାନ କରିଛନ୍ତି । ପୂର୍ବତନ ସଭାପତି ଚିନ୍ମୟ ପ୍ରଧାନ ଏବଂ ଦଶପଲ୍ଲା ଅଞ୍ଚଳର କିଛି ଯୁବ ନେତୃତ୍ୱଙ୍କ ସହ ଦଶପଲ୍ଲା ନିର୍ବାଚନ ମଣ୍ଡଳୀରେ ବିଜେଡିକୁ ଆହୁରି ସୁଦୃଢ କରିବା ପାଇଁ ଦଶପଲ୍ଲା ବ୍ଲକ ଅନ୍ତର୍ଗତ ନଛିପୁର, ଘୁଗୁଡ଼ିପଡା, ମଧ୍ୟଖଣ୍ଡ ପଞ୍ଚାୟତର ବିଭିନ୍ନ ଗ୍ରାମ ବୁଲି ଯୁବକ ମାନଙ୍କ ସହ କଥା ହେବା ସହ ଆଗାମୀ ଦିନରେ କିପରି ଯୁବପିଢ଼ି ସମାଜ ଗଠନରେ ନିଜକୁ ନିୟୋଜିତ କରିବେ, ସରକାରଙ୍କ ବିଭିନ୍ନ ଜନକଲ୍ୟାଣ ଯୋଜନା ଗୁଡ଼ିକ ଲୋକଙ୍କ ନିକଟରେ ପହଞ୍ଚି ପାରିବ ସେ ବିଷୟରେ ଆଲୋଚନା କରିଛନ୍ତି । ଆଗକୁ ନିର୍ବାଚନ ମଣ୍ଡଳୀର ପ୍ରତ୍ୟେକ ପଞ୍ଚାୟତ ବୁଲିବା ସହ ଯୁବ ସଂଗଠନକୁ ଆହୁରି ସକ୍ରିୟ କରିବା ପାଇଁ ଯୁବ ନେତା ଚିନ୍ମୟ ପ୍ରଧାନ ସୂଚନା ଦେଇଛନ୍ତି।
