ରଣପୁର, (ନୟାଗଡ଼ ଦର୍ପଣ): ଚମ୍ପାଗଡ଼ ପ୍ରିମିୟର ଲିଗ୍ (CPL) କ୍ରିକେଟ୍ ଟୁର୍ଣ୍ଣାମେଣ୍ଟର ଦ୍ୱିତୀୟ ଦିବସ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି। ଆଜି ୧୨ ଓଭର ବିଶିଷ୍ଟ ଦୁଇଟି ରୋମାଞ୍ଚକର ମ୍ୟାଚ୍ ଅନୁଷ୍ଠିତ ହୋଇଥିଲା।
ପ୍ରଥମ ମ୍ୟାଚ୍ରେ ବିବିଡି ଇଲେଭେନ୍ ଦଳ ଚିଅର୍ସ ଇଲେଭେନ୍କୁ ୧୧ ରନ୍ରେ ପରାସ୍ତ କରି ବିଜୟୀ ହୋଇଥିବା ବେଳେ ଦ୍ୱିତୀୟ ମ୍ୟାଚ୍ରେ ମହାବୀର ଇଲେଭେନ୍ ଷ୍ଟାର୍ ଦଳ ଏକ ସଂଘର୍ଷପୂର୍ଣ୍ଣ ମୁକାବିଲାରେ MRC ଇଲେଭେନ୍କୁ ୪ ରନ୍ରେ ହରାଇ ବିଜୟ ହାସଲ କରିଥିଲା।
ଏହି ଅବସରରେ ବିଜେପି ଚାନ୍ଦପୁର ମଣ୍ଡଳର ସାଧାରଣ ସମ୍ପାଦକ ଗଣେଶ୍ୱର ମାନ୍ଧାତା ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ସମାଜସେବୀ ନିରଞ୍ଜନ ମାନସିଂହ ଓ ସର୍ବେଶ୍ୱର ମାନସିଂହ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ।
ମୁଖ୍ୟ ଅତିଥି ଗଣେଶ୍ୱର ମାନ୍ଧାତା ନିଜ ଅଭିଭାଷଣରେ କହିଥିଲେ ଯେ, ଆମେ ସମସ୍ତେ ମିଳିମିଶି ଏଭଳି ଏକ ସୁସ୍ଥ ସାମାଜିକ ପରିବେଶ ଗଢ଼ିବା ଆବଶ୍ୟକ, ଯେଉଁଠି ଯୁବପିଢ଼ି ନିଶାଠାରୁ ଦୂରେଇ ରହିବା ସହ ଖେଳ ପ୍ରତି ଆକୃଷ୍ଟ ହେବେ ଏବଂ ନିଜ ଅଞ୍ଚଳର ବିକାଶରେ ସକ୍ରିୟ ଭାଗୀଦାର ହେବେ।
ସେ ଆହୁରି କହିଥିଲେ ଯେ, ଆୟୋଜକ କମିଟିର ଏହି ପ୍ରୟାସ କେବଳ ଏକ କ୍ରିକେଟ୍ ଟୁର୍ଣ୍ଣାମେଣ୍ଟ ମଧ୍ୟରେ ସୀମିତ ନୁହେଁ, ବରଂ ଏହା ଅଞ୍ଚଳର ଯୁବକମାନଙ୍କୁ ଏକାଠି କରିବା ଏବଂ ସେମାନଙ୍କ ମଧ୍ୟରେ ଭାଇଚାରା, ଏକତା ଓ କ୍ରୀଡ଼ା ମନୋଭାବ ସୃଷ୍ଟି କରିବାର ଏକ ସୁନ୍ଦର ମାଧ୍ୟମ। ଏଥିପାଇଁ ସେ ଆୟୋଜକ କମିଟିକୁ ଅଭିନନ୍ଦନ ଜଣାଇବା ସହ ସେମାନଙ୍କ ଉଦ୍ୟମକୁ ଭୂୟସୀ ପ୍ରଶଂସା କରିଥିଲେ।
ଏହି କ୍ରିକେଟ୍ ଆୟୋଜନ ଅଞ୍ଚଳର ଯୁବପିଢ଼ିଙ୍କ ମଧ୍ୟରେ କ୍ରୀଡ଼ା ପ୍ରତି ଆଗ୍ରହ ବଢ଼ାଇବା ସହ ନିଶାମୁକ୍ତ ସମାଜ ଗଠନ ଓ ଯୁବ ଏକତାକୁ ସୁଦୃଢ଼ କରିବାରେ ସହାୟକ ହେବ ବୋଲି ମତ ପ୍ରକାଶ ପାଇଥିଲା।
ଚମ୍ପାଗଡ଼ ପ୍ରିମିୟର ଲିଗ୍ର ଦ୍ୱିତୀୟ ଦିବସ: ବିବିଡି ଓ ମହାବୀର ଇଲେଭେନ୍ ଷ୍ଟାର୍ ବିଜୟୀ
