ନୟାଗଡ, (ନୟାଗଡ଼ ଦର୍ପଣ): ଉତ୍କଳ ସାହିତ୍ୟ ସମାଜ ନୟାଗଡ ଶାଖାର ଷଷ୍ଠ ବାର୍ଷିକ ଉତ୍ସବ ସ୍ଥାନୀୟ ବଜେନ୍ଦ୍ର ଉଚ୍ଚ ବିଦ୍ୟାଳୟ ସଭାଗୃହରେ ଅନୁଷ୍ଠିତ ହୋଇଯାଇଛି । ଏହି ଉତ୍ସବରେ ପ୍ରାକ୍ତନ ଅଧ୍ୟକ୍ଷ ପୂର୍ଣ୍ଣଚନ୍ଦ୍ର ମହାପାତ୍ର, ଅବସରପ୍ରାପ୍ତ ଅଧ୍ୟାପକ ବିଜୟ କୁମାର ଜେନା ଓ ପୂର୍ବତନ ଅଧ୍ୟକ୍ଷ ଅଶୋକ କୁମାର ନାୟକ ଯୋଗଦେଇ ବକ୍ତବ୍ୟ ରଖିଥିଲେ। ଓଡ଼ିଆ ସାହିତ୍ୟର ଅନ୍ଧକାରମୟ ଯୁଗ ସମୟରେ ଏହି ସାହିତ୍ୟ ସମାଜର ସୃଷ୍ଟି ” ଯେତେବେଳେ ଓଡ଼ିଆ ଭାଷା ଏକ ସ୍ବତନ୍ତ୍ର ଭାଷା ନୁହେଁ” ବୋଲି ସ୍ୱର ଉଠିଥିଲା ଠିକ୍ ସେହି ସମୟରେ ମଧୁସୂଦନ ରାଓ, ଫକିର ମୋହନ ସେନାପତି, ଗୋପବନ୍ଧୁ ଦାସ, ଗଙ୍ଗାଧର ମେହେର, ରାଧାନାଥ ରାୟ ପ୍ରଭୃତି ପ୍ରତିଷ୍ଠିତ ସାହିତ୍ୟିକଗଣ ଏହା ବିରୁଦ୍ଧରେ ସ୍ୱର ଉତ୍ତୋଳନ କରିଥିଲେ ଏବଂ ଉତ୍କଳ ସାହିତ୍ୟ ସମାଜ ପ୍ରତିଷ୍ଠା କରିଥିଲେ । ଏହି ଅବସରରେ ଏକ ଜିଲ୍ଲାସ୍ତରୀୟ କବିତା ପାଠୋତ୍ସବର ଆୟୋଜନ କରାଯାଇଥିଲା ଯାହାକୁ କବି ହରପ୍ରିୟା ଦ୍ବିବେଦୀ ଏବଂ ଗୋପୀନାଥ ସେଠୀ କବିତା ଗୁଡ଼ିକୁ ସଂଯୋଜନା କରିଥିଲେ । ସାହିତ୍ୟ ସମାଜର ଆବାହକ ଡ଼. ନିର୍ମଳ ଚନ୍ଦ୍ର ଶୂରଦେଓ ନୟାଗଡ ଶାଖାର ଇତିବୃତ୍ତି ଉପରେ ସମ୍ୟକ୍ ସୂଚନା ଦେଇଥିଲେ। ଏହି ଉତ୍ସବରେ ଗୀତାଞ୍ଜଳି ମହାପାତ୍ର, ସୌଦାମିନୀ ସ୍ୱାଇଁ ଏବଂ ଝିଲିମିଲ ସାହୁଙ୍କୁ ସମ୍ବର୍ଦ୍ଧିତ କରାଯାଇଥିଲା । ବରିଷ୍ଠ ଶିଶୁ ସାହିତ୍ୟିକା ବସିରନ୍ ବିବି ଏହି କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିଲେ।
ଉତ୍କଳ ସାହିତ୍ୟ ସମାଜ ନୟାଗଡ ଶାଖାର ଷଷ୍ଠ ବାର୍ଷିକ ଉତ୍ସବ
