ଦଶପଲ୍ଲା:(ନୟାଗଡ଼ ଦର୍ପଣ): ପିକନିକ ଯିବାବେଳେ ବସକୁ ଧକ୍କା ଦେଲା ଟ୍ରକ। ନୟାଗଡ ଜିଲ୍ଲା ଦଶପଲ୍ଲା ଏନ୍ଏସି ଅନ୍ତର୍ଗତ ଵାରପୁରିକିଆ ଠାରେ ଥିବା “ଦେଵୀସ୍ ଟ୍ୟାଲେଣ୍ଟ ଟ୍ୟୁଟୋରିଆଲ” ନାମକ ଏକ ଘରୋଇ ଶିକ୍ଷାନୁଷ୍ଠାନ ତାର ଅନ୍ତେବାସୀମାନଙ୍କୁ ନେଇ ହରିଶଙ୍କର ଅଭିମୁଖେ ଯାଉଥିବା ଵେଳେ ସାମନା ପଟୁ ଆସୁଥିବା ଏକ ଚାଉଳ ବୋଝେଇ ଟ୍ରକ୍ ବସକୁ ଧକ୍କା ଦେଇଥିଲା। ଏହି ଧକ୍କାରେ ଘଟଣାସ୍ଥଳରେ ୨ଜଣ ଏଵଂ ପରେ ଚିକିତ୍ସାଧୀନ ଅବସ୍ଥାରେ ଜଣଙ୍କର ମୃତ୍ୟୁ ହୋଇଯାଇଛି। ବିଳମ୍ବିତ ରାତ୍ରିରେ ଘଟିଥିବା ଏହି ଘଟଣା ଦଶପଲ୍ଲା ଅଞ୍ଚଳରେ ଏକ ଶୋକାକୁଳ ପରିବେଶ ସୃଷ୍ଟି କରିଛି। ମୃତକମାନେ ହେଲେ ଅମ୍ରିତା ସାହୁ, ଚିନ୍ମୟୀ ପ୍ରିୟଦର୍ଶିନୀ ଓ ଲୋପାମୁଦ୍ରା ପ୍ରଧାନ। ଘଟଣା ସଂପର୍କରେ ଖବର ପାଇ ବିଧାୟକ ରମେଶ ବେହେରା, ନୟାଗଡ଼ ଏସ୍ ପି ରାହୁଲ ଜୈନ୍, ଏସଡିପିଓ ସ୍ନେହାଶିଷ ସାହୁ, ଦଶପଲ୍ଲା ଆଇଆଇସି ମୁକେଶ ଵେହେରା, ନୂଆଗାଁ ଆଇଆଇସି ପ୍ରମୁଖ ଉପସ୍ଥିତ ରହି ଜିଲ୍ଲାପାଳଙ୍କ ଅନୁମୋଦନ କ୍ରମେ ଶବ ବ୍ୟବଚ୍ଛେଦ କରାଇ ପରିବାରକୁ ହସ୍ତାନ୍ତର କରି ଦେଇଛନ୍ତି। ପୁଲିସ ଉଭୟ ଗାଡିକୁ ଜବତ୍ କରି ତଦନ୍ତ ଜାରି ରଖିଛି।
ପିକନିକ ଯିବାବେଳେ ଦୁର୍ଘଟଣା: ବସ ସହ ଟ୍ରକ ମୁହାଁମୁହିଁ ଧକ୍କା, ୩ଛାତ୍ରୀଙ୍କର ମୃତ୍ୟୁ
