ଶରଣକୁଳ,(ନୟାଗଡ଼ ଦର୍ପଣ): ଶରଣକୁଳ ଥାନା ଅନ୍ତର୍ଗତ ଗୋଡିପଡ଼ା ଫାଣ୍ଡି ଠାରୁ ମାତ୍ର ୧୦୦ ଫୁଟ୍ ଦୂରରେ ଡକାୟତି । ଦିନ ଦ୍ୱିପହରରେ ବୋମା ଫୁଟାଇ ମହାଲକ୍ଷ୍ମୀ ଜୁଏଲାରୀରୁ ଡକାୟତମାନେ ସୁନା ଅଳଙ୍କାର ଲୁଟି ନେଇଛନ୍ତି । ସୂଚନା ଅନୁଯାୟୀ, ତିନି ଜଣ ଯୁବକ ଏକ ନୀଳ ରଙ୍ଗର ମଟର ସାଇକେଲରେ ପହଞ୍ଚି ହଠାତ୍ ସୁନା ଦୋକାନ ଉପରକୁ ବୋମା ମାଡ଼ କରିଥିଲେ । ଏହାପରେ ଦୋକାନ ମାଲିକ ହରିହର ସାହୁଙ୍କୁ ବନ୍ଧୁକ ଦେଖାଇ ୫ଲକ୍ଷ ଟଙ୍କାରୁ ଅଧିକ ମୂଲ୍ୟର ସୁନାହଗଣା ଲୁଟି ନେଇଥିଲେ । ତେବେ ଏତିକିରେ ସେମାନଙ୍କ ମନ ମାନି ନଥିଲା । ତେଣୁ ସେମାନେ ସୁନା ଦୋକାନର ସମ୍ମୁଖରେ ଥିବା ସୁନା ଦୋକାନର ୱାର୍କସପ୍ ଭିତରେ ପଶି ମଧ୍ୟ ଲୁଟ୍ କରିବାକୁ ଉଦ୍ୟମ କରିଥିଲେ । ତେବେ ସେଠାରୁ କିଛି ମିିଳି ନଥିଲା । ଏହାପରେ ଡକାୟତମାନେ ଗୋଡ଼ିପଡ଼ା ଠାରୁ ମାତ୍ର ୨ କି.ମି ଦୂରରେ ଥିବା ଏସାର୍ ପେଟ୍ରେଲ ପମ୍ପ ଭିତରେ ପଶି କର୍ମଚାରୀମାନଙ୍କୁ ବନ୍ଧୁକ ମୁନରେ ପ୍ରାୟ ୧ଲକ୍ଷ ଟଙ୍କା ଲୁଟ୍ କରିଥିଲେ । ଦୁଇଟି ଡକାୟତି ପରେ ସେମାନେ ତୁଲୁବି ରାସ୍ତାରେ ଚମ୍ପଟ୍ ମାରିଥିବା ପ୍ରତ୍ୟକ୍ଷଦର୍ଶୀଙ୍କ ଠାରୁ ପ୍ରକାଶ । ଡକାୟତଙ୍କ ବୋମା ମାଡ଼ରେ ସୁନା ଦୋକାନ ମାଲିକ ଆହତ ହୋଇଛନ୍ତି । ଖବର ପାଇ ଶରଣକୁଳ ଥାନା ଅଧିକାରୀ ପୋଲିସ ଫୋର୍ସ ସହ ଘଟଣାସ୍ଥଳରେ ପହଞ୍ଚି ରଣପୁର ଥାନାକୁ ଖବର ଦେଇଥିଲେ । ରଣପୁର ଥାନା ଅଧିକାରୀ ମଧ୍ୟ ଘଟଣାସ୍ଥଳରେ ପହଞ୍ଚି ଡକାୟତମାନେ ଯାଇଥିବା ରାସ୍ତାକୁ ସିଲ୍ କରି ଦେଇଥିଲେ । ଶରଣକୁଳ ଏସଡିପିଓ କିରଣ ହେମ୍ବ୍ରମ୍ ଘଟଣାର ଅନୁସନ୍ଧାନ ଜାରି ରଖିଛନ୍ତି । ଅନ୍ୟପଟେ ଏହି ଡକାୟତି ଘଟଣା ଗୋଡିପଡ଼ା ଅଞ୍ଚଳରେ ଆତଙ୍କ ସୃଷ୍ଟି କରିଛି । ଗୋଡିପଡ଼ା ଅଞ୍ଚଳରେ ପୂର୍ବରୁ କେବେ ମଧ୍ୟ ଏଭଳି ଡକାୟତି ହୋଇନଥିବା ଅଞ୍ଚଳବାସୀ ପ୍ରକାଶ କରିଛନ୍ତି।
ବୋମାମାଡ଼ ସହ ବନ୍ଧୁକ ମୁନରେ ୫ଲକ୍ଷରୁ ଉର୍ଦ୍ଧ୍ବ ଟଙ୍କାର ସୁନାଗହଣା ଲୁଟିଲେ ଡକାୟତ
