ନୟାଗଡ଼,(ନୟାଗଡ଼ ଦର୍ପଣ): ରାଜ୍ୟର ସମସ୍ତ ସବ୍-ରେଜିଷ୍ଟ୍ରାର ଅଫିସରେ ଜମି ଦଲାଲଙ୍କ ଦୌରାତ୍ମ୍ୟ ରୋକିବା ପାଇଁ ସରକାର କଡ଼ା ପଦକ୍ଷେପ ନେବାକୁ ଯାଉଛନ୍ତି। ଏଣିକି ନୟାଗଡ଼ ଜିଲ୍ଲା ସମେତ ସବୁ ସବ୍-ରେଜିଷ୍ଟ୍ରାର କାର୍ଯ୍ୟାଳୟରେ ଚିହ୍ନଟ ହୋଇଥିବା ଜମି ଦଲାଲଙ୍କ ଫଟୋ ପ୍ରଦର୍ଶନ କରାଯିବ। ଏହି ସୂଚନା ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଦେଇଛନ୍ତି।
ମନ୍ତ୍ରୀ କହିଛନ୍ତି ଯେ, ଜମି ପଞ୍ଜୀକରଣ କାର୍ଯ୍ୟରେ ସାଧାରଣ ଲୋକଙ୍କୁ ହଇରାଣ କରୁଥିବା ଓ ଅବୈଧ ଭାବେ ଟଙ୍କା ଆଦାୟ କରୁଥିବା ଦଲାଲମାନଙ୍କ ଉପରେ କଡ଼ା ନଜର ରଖାଯିବ। ସେମାନଙ୍କ ଫଟୋ କାର୍ଯ୍ୟାଳୟ ପରିସରରେ ଲଗାଯିବା ଫଳରେ ଲୋକମାନେ ସତର୍କ ରହିପାରିବେ ଏବଂ ଦଲାଲଙ୍କ ଠକେଇରୁ ବଞ୍ଚିପାରିବେ।
ସରକାରଙ୍କ ଲକ୍ଷ୍ୟ ହେଉଛି ଜମି ପଞ୍ଜୀକରଣ ପ୍ରକ୍ରିୟାକୁ ଅଧିକ ସ୍ୱଚ୍ଛ, ସରଳ ଓ ଦୁର୍ନୀତିମୁକ୍ତ କରିବା। ଏଥିପାଇଁ ସବ୍-ରେଜିଷ୍ଟ୍ରାର ଅଫିସଗୁଡ଼ିକରେ ସଚେତନତା ବଢ଼ାଇବା ସହ ଦଲାଲଙ୍କ ବିରୋଧରେ ଆବଶ୍ୟକ ଆଇନଗତ କାର୍ଯ୍ୟାନୁଷ୍ଠାନ ମଧ୍ୟ ନିଆଯିବ।
ସରକାରଙ୍କ ଏହି ପଦକ୍ଷେପକୁ ସାଧାରଣ ଲୋକ ସ୍ୱାଗତ କରିଥିବା ବେଳେ ଏହା ଜମି ପଞ୍ଜୀକରଣ ବ୍ୟବସ୍ଥାରେ ସ୍ୱଚ୍ଛତା ଆଣିବ ବୋଲି ଆଶା କରାଯାଉଛି।
ସବ୍-ରେଜିଷ୍ଟ୍ରାର ଅଫିସରେ ଲାଗିବ ଜମି ଦଲାଲଙ୍କ ଫଟୋ
