ନୟାଗଡ଼, (ନୟାଗଡ଼ ଦର୍ପଣ): ନୟାଗଡ଼ ବ୍ଲକ ମାଳତୀପୁର ଗାଁର ଶିଶୁ କନ୍ୟା ମୀରା ବୈଷ୍ଣବୀ ବେହେରା ନିଜର ଅସାଧାରଣ ସ୍ମରଣଶକ୍ତି ଓ ପ୍ରତିଭା ବଳରେ ୨୦୨୬ ଇଣ୍ଡିଆ ବୁକ୍ ଅଫ୍ ରେକର୍ଡରେ ସ୍ଥାନ ପାଇ ନୟାଗଡ଼ ପାଇଁ ଗୌରବ ଆଣିଛନ୍ତି।
ଅଳ୍ପ ବୟସରୁ ମୀରା ବୈଷ୍ଣବୀ ଅନର୍ଗଳ ଭାବେ ୨୮ଟି ରାଜ୍ୟ ଓ ସେଗୁଡ଼ିକର ରାଜଧାନୀର ନାମ, ୨୧ଟି ଜାତୀୟ ପ୍ରତୀକ ଓ ୨୧ଟି ଫଳର ନାମ କହିପାରୁଛନ୍ତି। ଏହା ସହିତ ୧୭ଟି ପ୍ରାଣୀ, ୨୦ଟି ପନିପରିବା, ୨୬ଟି ଭୌଗୋଳିକ ବସ୍ତୁ, ୬ଟି ଋତୁ, ୭ଟି ନର୍ସରୀ ରାଇମ୍ ଓ ୮ଟି ଗ୍ରହର ନାମ ମଧ୍ୟ ସହଜରେ କହିପାରୁଛନ୍ତି। ସେହିପରି ୧ରୁ ୩୦ ପର୍ଯ୍ୟନ୍ତ ସଂଖ୍ୟା ମଧ୍ୟ ଅନର୍ଗଳ ଭାବେ ଗଣନା କରିପାରୁଛନ୍ତି। ତାଙ୍କର ଏହି ଅସାଧାରଣ ପ୍ରତିଭା ଓ ସ୍ମରଣଶକ୍ତି ତାଙ୍କୁ ଇଣ୍ଡିଆ ବୁକ୍ ଅଫ୍ ରେକର୍ଡରେ ସ୍ଥାନ ପାଇବାର ସୁଯୋଗ ଦେଇଛି। ଏହି ସଫଳତା ପରେ ପରିବାର, ସମ୍ପର୍କୀୟ ଓ ଗ୍ରାମବାସୀଙ୍କ ମଧ୍ୟରେ ଖୁସିର ମାହୋଲ୍ ସୃଷ୍ଟି ହୋଇଛି।
ଝିଅର ଏହି ଅପୂର୍ବ ସଫଳତାରେ ବାପା ସଞ୍ଜୀବ ବେହେରା ଓ ମା ବିଷ୍ଣୁପ୍ରିୟା ଗର୍ବିତ ହେବା ସହ ଖୁସି ପ୍ରକଟ କରିଛନ୍ତି। ଅଳ୍ପ ବୟସରେ ମୀରା ବୈଷ୍ଣବୀଙ୍କ ଏହି ପ୍ରତିଭା ଆଗାମୀ ଦିନରେ ତାଙ୍କୁ ଆହୁରି ବଡ଼ ସଫଳତା ଦେବ ବୋଲି ପରିବାର ଆଶା ପ୍ରକାଶ କରିଛି।
ସାର୍ଟିଫିକେଟ ସହ କୁନି ପ୍ରତିଭା ମୀରା ବୈଷ୍ଣବି
