ଇଟାମାଟି: ନୟାଗଡ଼ ବ୍ଲକ ଇଟାମାଟି ଥାନା ଅଞ୍ଚଳର ଦେଖିବାକୁ ମିଳିଛି ଅଭାବନୀୟ ଘଟଣା । ଲଭ ସେକ୍ସ ଧୋକା ଅଭିଯୋଗ ଆଣି ପ୍ରେମିକର ବିବାହ ଭୋଜିରେ ପ୍ରେମିକା ଦେଲା ଧାରଣା । ଯାହାକୁ ନେଇ ଗାଁରେ ତୁମୁଳକାଣ୍ଡ ହେଲା ପରେ ମାମଲା ଏବେ ଥାନାରେ ପହଞ୍ଚିଛି l ଏହି ଘଟଣାକୁ ନେଇ ଥାନାରେ ମାମଲା ରୁଜୁ ହେବା ସହ ପ୍ରେମିକକୁ ଥାନାରେ ଅଟକ ରଖି ତଦନ୍ତ କରୁଛି ପୋଲିସ ।
ସମ୍ପୂର୍ଣ୍ଣ ଘଟଣା କ୍ରମ ଅନୁସାରେ ନୟାଗଡ଼ ଜିଲ୍ଲା ଇଟାମାଟି ଥାନା ଅନ୍ତର୍ଗତ ତେନ୍ତୁଳିଆପଲ୍ଲୀ ଗାଁରେ ଘଟିଛି ଏହି ଘଟଣା l ଇଟାମାଟି ଥାନା ଅନ୍ତର୍ଗତ ତେନ୍ତୁଳିଆପଲ୍ଲୀ ଗାଁ ବାପୁନୀ ନାୟକଙ୍କ ପୁରୀ ଜିଲ୍ଲା ବଳଙ୍ଗା ଥାନା ଅଞ୍ଚଳରେ ଜଣେ ଯୁବତୀଙ୍କ ସହିତ ପ୍ରେମ ସଂପର୍କ ଗଢି ଉଠିଥିଲା । ପ୍ରେମ ସମ୍ପର୍କକୁ ନେଇ ପ୍ରେମିକ ବାପୁନୀ ବିବାହ କରିବାର ପ୍ରତିଶ୍ରୁତି ଦେଇ ଉକ୍ତ ଯୁବତୀଙ୍କ ସହ ଶାରୀରିକ ସମ୍ପର୍କ ରଖି ଆସୁଥିଲା। କିନ୍ତୁ ପ୍ରାୟ ଗତ ମାସେ ହେଲା ପ୍ରେମିକ ବାପୁନୀ ଆଉ ଉକ୍ତ ଯୁବତୀଙ୍କ ଫୋନ କଲ ନଉଠାଇବା ସହ କୌଣସି ଯୋଗାଯୋଗ ରଖିନଥିଲେ । ପରେ ପ୍ରେମିକା ଯୁବତୀ ଜଣକ ପ୍ରେମିକ ବାପୁନୀର ବିବାହ ସରିଥିବା ଜାଣିବାକୁ ପାଇଥିଲା l ସେଥିପାଇଁ ସୋମବାର ସନ୍ଧ୍ୟାରେ ବାପୁନୀର ବିବାହ ଭୋଜି ସମସ୍ତେ ହର୍ଷଉଲ୍ଲାସ କରୁଥିବାବେଳେ ଯୁବତୀ ଜଣକ ତେନ୍ତୁଳିଆପଲ୍ଲୀ ଗାଁରେ ପହଞ୍ଚି ପ୍ରେମିକ ବାପୁନୀର ଘର ଆଗରେ ଧାରଣା ଦେଇଥିଲେ l
ଏହି ଘଟଣା ଗାଁରେ ଅଶାନ୍ତି ସୃଷ୍ଟି କରିଥିବା ମଧ୍ୟ ଦେଖିବାକୁ ମିଳିଥିଲା । ଘଟଣା ସମ୍ପର୍କରେ ଇଟାମାଟି ପୁଲିସ୍ ଖବର ପାଇ ବିବାହ ଭୋଜି ସ୍ଥଳରେ ପହଞ୍ଚିବା ସହ ପ୍ରେମିକ ବାପୁନୀ ଓ ପ୍ରେମିକା ଯୁବତୀକୁ ଥାନାକୁ ଆଣି ତଦନ୍ତ ଆରମ୍ଭ କରିଛି । ଉକ୍ତ ଯୁବତୀଙ୍କ ଅଭିଯୋଗ କ୍ରମେ ଇଟାମାଟି ଥାନାରେ କେସ ନଂ ୭୭/୨୧ ରେ ମାମଲା ରୁଜୁ କରାଯାଇ ପ୍ରେମିକ ବାପୁନୀକୁ ଅଟକ ରଖି ପଚରାଉଚରା କରାଯାଉଥିବା ସୂଚନା ଦେଇଛି ପୋଲିସ ।
