ସରଣକୂଳ, (ନୟାଗଡ଼ ଦର୍ପଣ): ଓଡ଼ଗାଁ ବ୍ଲକ ଶରଣକୁଳ ପୂର୍ତ୍ତବିଭାଗ ବଙ୍ଗଳା ନିକଟରେ ଭୁବନେଶ୍ୱରରୁ ଭଞ୍ଜନଗର ଯାଉଥିବା ଓଡି ୩୩ -ପି ୦୧୨୦ ନମ୍ବର ବିଶିଷ୍ଟ ଏକ ଘରୋଇ ଯାତ୍ରୀବାହୀ ବସ ଆଜି ସକାଳେ ଦୁର୍ଘଟଣା ଗ୍ରସ୍ତ ହୋଇଛି। ଏହି ଦୁର୍ଘଟଣାରେ ୨ବଖରା ଟିଣ ଛପର ଘର ଭାଙ୍ଗିଯାଇଥିବା ବେଳେ ଜଣେ ଗୁରୁତର ଏବଂ ତିନି ଜଣ ଆହତ ହୋଇଥିବା ସୂଚନା ମିଳିଛି। ଗୁରୁତର ବ୍ୟକ୍ତି ଏବଂ ଆହତ ବ୍ୟକ୍ତିଙ୍କୁ ପ୍ରଥମେ ଶରଣକୁଳ ମେଡ଼ିକାଲରେ ଚିକିତ୍ସା ପରେ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଦୁର୍ଘଟଣାରେ ଗୁରୁତର ହୋଇଥିବା ଶେକ ଖାସିମଙ୍କ ଅଧିକ ଚିକିତ୍ସା ପାଇଁ ଭୁବନେଶ୍ୱର ମେଡିକାଲକୁ ପଠାଯାଇଛି । ଘଟଣାସ୍ଥଳରେ ଉପସ୍ଥିତ ପ୍ରତକ୍ଷଦର୍ଶୀଙ୍କ ଠାରୁ ସୂଚନା ଅନୁଯାୟୀ କୌଣସି କାରଣରୁ ବସଟି ବଙ୍ଗଳା ବୁଲାଣିରେ ବାମକୁ ବୁଲାଇବା ପରିବର୍ତ୍ତେ ରାସ୍ତାର ଡାହାଣ ପାଖକୁ ମାଡି ଆସିଥିଲା। ଫଳରେ ନିଜ ଘରେ ବସିଥିବା ଶେଖ ଖାସିମକୁ ଧକ୍କାଦେଇ ତାଙ୍କର ଦୁଇ ବଖରା ଟିଣ ଛପର ଘରକୁ ଭାଙ୍ଗି ଏକ ସଜନା ଗଛକୁ ଧକ୍କା ଦେଇଥିଲା। ଫଳରେ ବସ ତଳେ ଚାପି ହୋଇ ଖାସିମ୍ ଗୁରୁତର ଆହତ ହୋଇ ପଡିଥିବା ଜଣାପଡ଼ିଛି। ମେସିନ ସାହାଯ୍ୟରେ ବସକୁ ଟେକି ତା ତଳୁ ଉଦ୍ଧାର କରି ନିକଟସ୍ଥ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ । ଘର କାନ୍ଥ ଭାଙ୍ଗିବାରେ ଶେଖ କୁନାଙ୍କ ପୁଅ ଶେଖ ମୁସ୍ତାଗ, ମିର ସୁଲତାନଙ୍କ ପୁଅ କିଶାନ ମିର ଓ ଚାନ୍ଦମିରଙ୍କ ପୁଅ ଫଜଲ ମିର ଆହତ ହୋଇଛନ୍ତି।ଖବର ପାଇ ଦୁର୍ଘଟଣା ସ୍ଥଳରେ ଶରଣକୁଳ ଥାନା ପୁଲିସ ପହଁଚି ତଦନ୍ତ କରିବା ସହିତ ଦୁର୍ଘଟଣାଗ୍ରସ୍ତ ବସଟିକୁ ଜବତ କରିଥିବା ଜଣାପଡ଼ିଛି।
