ନୟାଗଡ଼,(ନୟାଗଡ଼ ଦର୍ପଣ): ରାଜ୍ଯର ବିଦ୍ୟାଳୟ ଓ ଗଣଶିକ୍ଷା ବିଭାଗ ନିର୍ଦ୍ଦେଶ ମୁତାବକ ସିନ୍ଦୁରିଆ ଉଚ୍ଚ ବିଦ୍ୟାଳୟ ସଭାଗୃହରେ ପ୍ରଧାନଶିକ୍ଷୟିତ୍ରୀ ଝୁମୁରୀ ସାହୁଙ୍କ ସଭାପତିତ୍ବରେ ତୃତୀୟ ଅଭିଭାବକ ଓ ଶିକ୍ଷକ ସଂଘ ବୈଠକ ଅନୁଷ୍ଠିତ ହୋଇଯାଇଛି। ଆଜିର ବୈଠକ ପ୍ରାରମ୍ଭରେ ପ୍ରଧାନଶିକ୍ଷୟିତ୍ରୀ ଉପସ୍ଥିତ ଅଭିଭାବକ, ଶିକ୍ଷକ, ଶିକ୍ଷୟିତ୍ରୀ ଓ ବିଦ୍ୟାଳୟ ପରିଚାଳନା କମିଟି ସଦସ୍ୟ ସଦସ୍ୟାଙ୍କୁ ସ୍ବାଗତ କରିବା ସହିତ ସଭା ପରିଚାଳନା କରିଥିଲେ। ଅତିଥି ଭାବରେ ବିଦ୍ୟାଳୟ ପରିଚାଳନା କମିଟି ସଭାପତି ନାରାୟଣ ସାହୁ ଉପସ୍ଥିତ ଥିଲେ। ପରିଚାଳନା କମିଟି ସଦସ୍ୟ ତଥା ଅଭିଭାବକ ପ୍ରତିନିଧି ସନ୍ତୋଷ ସାହୁ, କୁନା ସାହୁ ସମେତ ଛାତ୍ର ଅଭିଭାବକ ମୀର୍ ଅମଜାଦ୍, ରହନୁମା ବେଗମ୍ ପ୍ରମୁଖ ଶୈକ୍ଷିକ ଆଲୋଚନାରେ ଅଂଶଗ୍ରହଣ କରିଥିଲେ। ଆପାର୍ ଆଇଡି ଖୋଲିବା ଉପରେ ସହକାରୀ ଶିକ୍ଷକ ସଲିମ୍ ଇବ୍ରାହିମ୍ ସଭିଙ୍କୁ ଧାରଣା ଦେଇଥିଲେ। ବିଦ୍ୟାଳୟ ସମ୍ମୁଖରେ ଭାରିଯାନ ରଖାଯାଉଥିବା ଯୋଗୁଁ ଭବିଷ୍ୟତରେ ଦୁର୍ଘଟଣାକୁ ଏଡ଼ାଇ ହେବ ନାହିଁ ବୋଲି ସଭିଁଏ ଉଦବେଗ ପ୍ରକାଶ କରିଥିଲେ। ତୁରନ୍ତ ଏହାର ପ୍ରତିକାର କରିବା ପାଇଁ ପରିବହନ ଅଧିକାରୀ ଓ ଥାନାକୁ ଜଣାଇବା ପାଇଁ ମତ ପ୍ରକାଶ ପାଇଥିଲା। ସେହିପରି ବିଦ୍ୟାଳୟ ସମ୍ମୁଖରେ ଅଳିଆ ଆବର୍ଜନା ପକାଇ ପରିବେଶକୁ କିଛି ଲୋକ ଦୂଷିତ କରୁଥିବା ଉପରେ ଆଲୋଚନା ହୋଇଥିଲା। ଛାତ୍ରଛାତ୍ରୀଙ୍କ ଅଧବାର୍ଷିକ ପରୀକ୍ଷାର ଫଳାଫଳ ଅଭିଭାବକଙ୍କୁ ଦିଆଯାଇଥିଲା। ସଭିଙ୍କ ସହଯୋଗ ରହିଲେ ବିଦ୍ୟାଳୟର ସାମଗ୍ରିକ ଉନ୍ନତି ହୋଇପାରିବ ବୋଲି ପ୍ରଧାନଶିକ୍ଷୟିତ୍ରୀ ସଭିଙ୍କୁ କଥା ଆକାରରେ ଜଣାଇଥିଲେ। ବିଦ୍ୟାଳୟ ଅଧୁରା କାର୍ଯ୍ୟ ତୁରନ୍ତ ସାରିବା ପାଇଁ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ସୁମିତ୍ରା ନାୟକଙ୍କୁ ଜଣାଇବା ସମ୍ପର୍କେ ପ୍ରସ୍ତାବ ଗୃହୀତ ହୋଇଥିବା ବେଳେ ଜିଲ୍ଲାପାଳଙ୍କୁ ତତ୍ ସମ୍ପର୍କେ ସୂଚିତ କରିବାକୁ ନିଷ୍ପତ୍ତି ନିଆଗଲା। ସଭାପତିଙ୍କ ସମ୍ୟକ୍ ଅଭିଭାଷଣ ପରେ ବୈଠକ ସମାପ୍ତ ହୋଇଥିଲା। ପରିଶେଷରେ ସହକାରୀ ଶିକ୍ଷୟିତ୍ରୀ ସୁଷମା ବିଶ୍ଵାଳ ସଭିଙ୍କୁ ଧନ୍ୟବାଦ୍ ଦେଇଥିଲେ।
